CNN Travel ја стави Македонија на листата на европски дестинации кои заслужуваат повеќе туристичко внимание. „Драматично планинска дестинација северно од Грција” – така нè опишуваат, и тоа всушност е комплимент.

Американскиот медиум нотира дека повеќето европски туристи се фокусираат на Франција, Шпанија и Италија, а континентот има 44 земји вредни за истражување. Македонија нуди „слично искуство, но без гужвите, долгите редици и високите цени.” Сончевата клима придонесува за квалитетно локално производство – зеленчукот е „сочен и богат”, а вината од домашните лозја „препознатливи по интензивниот вкус.”

Охридското Езеро и Црквата „Свети Јован Канео” се издвоени како меѓу најимпресивните симболи на регионот. Но CNN оди подалеку – ги споменува Стара Скопска Чаршија, Кањонот Матка, винските региони, Бигорскиот Манастир и Националниот парк Маврово. За Свети Наум нотираат дека стои на брегот на Охридското Езеро од 905 година.

Убаво е кога CNN пишува за нас. Уште поубаво би било кога ние самите би инвестирале во инфраструктурата која ја прави таа убавина достапна – а не само да чекаме странски медиуми да нè „откријат.”