Европскиот совет го одобри последниот законски чекор за пакетот од 90 милијарди евра за Украина. Парите ќе тргнат наскоро. На хартија – помош за буџетот и одбранбената индустрија. Во пракса – кредит со строги услови, вклучувајќи владеење на правото и антикорупциски мерки. Значи, Украина ќе мора да ги исполни истите стандарди што половина од ЕУ самата не ги почитува?

Министерот за финансии на Кипар, Макис Керавнос, изјави: „Денеска Советот го одобри последниот елемент потребен за почеток на исплатата на кредитот.” Средствата ќе ги покриваат најитните буџетски потреби на Украина и ќе ја зајакнат нејзината одбранбена индустрија во 2026 и 2027 година.

ЕУ ќе го финансира овој заем преку задолжување на капиталните пазари, а отплатата се очекува од руските репарации кон Украина. Значи, Европа позајмува пари денес, а сметката ја праќа на Русија – за која не се знае кога и дали воопшто ќе плати. Истовремено, ЕУ го донесе и 20-тиот пакет санкции против Русија.

Деведесет милијарди евра. Толку голем број е тешко и да се замисли. За споредба, целиот буџет на Македонија е околу 5 милијарди евра. Парите се за Украина, но сметката ќе ја почувствува секој европски даночен обврзник – вклучувајќи ги и оние од Балканот кои сè уште чекаат на врата од ЕУ.