„ЕУ се подготвува за војна со Русија до 2030“ – драматично предупредување од Будимпешта

Унгарскиот премиер Виктор Орбан тврди дека Брисел веќе работи на планови за подготвување на Европската Унија за можен судир со Русија до 2030 година. Во објава на Фејсбук, Орбан пишува дека програмата за вооружување иницирана од ЕУ има за цел „да ја направи Унијата подготвена за војна до 2030“, што, според него, се совпаѓа со забрзаниот процес за членство на Украина.

„Темни облаци се собираат над Европа. Брисел има целен датум за влегување во војната: 2030 година“, порача Орбан, пренесуваат унгарските медиуми.

Тој додаде дека 2026 година би можела да биде последната изборна шанса на Унгарија да одлучи за прашањата на мирот и војната, предупредувајќи дека некои одлуки се неповратни – како што, според него, била изградбата на оградата за мигранти во 2015 година.

„Ако донесеме погрешна одлука во 2026, ќе биде предоцна да ја поправиме до 2030 година. Кој сака мир, нека ни се придружи“, порача Орбан.