Додека дома често забораваме дека Македонци живеат и од другата страна на границата, во Шпанија се случи нешто што за нив значи многу. Генералното собрание на Европската слободна алијанса (ЕФА) во Гандија едногласно усвои резолуција за заштита на македонското малцинство во Албанија – документ што конечно ги става нивните права на европска маса.

Резолуцијата, предложена од Македонската алијанса за европска интеграција, чиј претседател Васил Стерјовски е и делегат во ЕФА, не е симболична декларација. Таа конкретно бара од албанските власти и од институциите на ЕУ да обезбедат образование на македонски јазик таму каде што има побарувачка, механизми за правична политичка застапеност – вклучително и можност за загарантирани места во парламентот – и одржливи економски вложувања во малцинските региони.

Документот оди и подалеку: бара зајакнување на независноста на Комитетот за национални малцинства, слободни и меѓународно набљудувани процеси на самоопределување, вклучително пописи, и ратификација на Европската повелба за регионални или малцински јазици. Со други зборови – сѐ она што едно малцинство треба да го има, а долго го немало.

Во контекстот, резолуцијата отворено укажува на надворешно политичко мешање, особено од Бугарија, и на неправилностите во пописните процеси што го попречуваат правото на самоопределување. Сега прашањето е што следува по гласањето во Гандија: дали ваквата резолуција ќе остане документ на хартија, или Скопје и Брисел навистина ќе застанат зад барањата за образование, застапеност и фер попис. Бидејќи признанието на правата е првиот чекор – но за малцинството во Албанија вистинската разлика ќе ја направи дури нивното спроведување на терен.