Финскиот основач Peter Sarlin, поранешен извршен директор на AMD Silo AI, ја основа новата компанија QuTwo и веќе ѝ обезбеди проценета вредност од 325 милиони евра (380 милиони долари) – и тоа само од ангелски круг на инвестирање. Без венчер фондови, без големи имиња од Силикон Вали. Само 25 милиони евра од приватни инвеститори со долгорочна визија.

QuTwo гради OS оркестрациски слој кој насочува сметачки задачи кон класични, квантни или хибридни архитектури. Терминот што го форсираат е „инспирирано од квантна физика” – користат класични чипови за да симулираат квантно однесување на стабилен хардвер. Дел од индустријата ќе каже дека тоа е маркетинг, дел ќе каже дека е реална инженерска одлука. Sarlin тврди дека во моментот тоа е единствениот пат кој има смисла, бидејќи стабилните квантни компјутери сè уште не постојат.

Зошто ангелски круг наместо венчер капитал? Ова е најинтересниот дел од приказната. Sarlin отворено зборува за „геополитичкото позиционирање на Европа” и потребата за стратешка слобода од пет до десет години. Превод – не сака да биде заробен од американски ризик-капитал кој очекува излез за три години. Компанијата првично беше финансирана преку неговиот семеен фонд, PostScriptum, пред да прифати надворешни ангели.

Списокот на ангели е респектабилен: Yuri Milner, Xavier Niel, Nico Rosberg, Dieter Schwarz и Niklas Zennström, плус основачи од Hugging Face, Miro, Skype, Supercell и Wolt. Сите европски имиња или со европски корени. Тоа не е случајно.

QuTwo веќе има околу 23 милиони долари осигурени приходи преку партнерства за дизајн, вклучително и работа со Zalando. Компанијата ангажирала околу 50 квантни и AI научници, меѓу кои поранешниот соосновач на Silo, Kaj-Mikael Björk, и соосновачот на IQM, Kuan Yen Tan.

„AI е Северната ѕвезда која ќе ја следиме. Квантната физика е само нов вид компјутирање”, изјави Sarlin. И втор цитат, кој вреди уште повеќе: „На мисија сме да изградиме глобално водечка AI компанија за следната парадигма, бидејќи Европа не успеа во оваа ера.” Тешко е да се игнорира таа реченица. Sarlin фактички вели – оваа AI трка беше изгубена пред да почне, ајде да градиме нешто за следната.