Google ќе му плаќа на SpaceX 920 милиони долари месечно за компјутерска моќ – и тоа на компанијата на Илон Маск, недела пред таа да излезе на берза. Зделката е обелоденета во регулаторна пријава во петок, а трае од октомври 2026 до јуни 2029. За тие пари Google добива пристап до околу 110.000 NVIDIA графички процесори плус останата опрема.

Да преведеме што значи ова. Google – компанијата што важи за најголемиот поединечен сопственик на ВИ-инфраструктура на светот – изнајмува туѓи сервери. Зошто? Затоа што, како што самите признаваат, побарувачката ги изненадила. „Ова е краткорочен договор за да обезбедиме мост-капацитет за наглата побарувачка за нашата платформа Gemini Enterprise, која е дури повисока отколку што очекувавме”, соопшти компанијата. Кога и најголемиот играч мора да изнајмува, тоа кажува нешто за тоа колку гладна е оваа индустрија за струја и силикон.

Зделката личи на онаа што SpaceX ја склучи со Anthropic кон крајот на мај – таму бројката беше 1,25 милијарди долари месечно за целиот капацитет на дата центарот Colossus 1 кај Мемфис, оној што xAI (сега дел од SpaceX) првично го градеше за себе. Google добива приближно половина од она што го зема Anthropic. Истата ферма, два гладни клиента, и сопственик што наплаќа на двете страни.

Контекстот зад сето ова е трошење што тешко се сфаќа. Alphabet, матичната на Google, вети над 180 милијарди долари капитални трошоци само оваа година, со „значително” повеќе во 2027. За да го финансира тоа, неодамна продаде акции за 80 милијарди. Ова не е штедлива компанија што мери секое евро – ова е трка во која влогот е да не заостанеш, по која било цена.

И тука е поентата. SpaceX излегува на берза за една недела со цел да собере околу 75 милијарди долари при проценета вредност од 1,75 трилиони – најголема во историјата. Google, кој е долгогодишен инвеститор во SpaceX, по излегувањето ќе има удел вреден над 100 милијарди. Значи Google плаќа милијарди за сервери на компанија во која веќе има милијарди. Парите се вртат во круг меѓу неколку имиња, а сметката за струјата ја плаќаме сите преку цената на секоја ВИ-алатка што ја користиме. Кој на крај заработува најмногу од оваа трка – не е тешко да се погоди.