Има градови што изгледаат како да се измислени за филм – а потоа се испоставува дека навистина се. Ванкувер, на западниот брег на Канада, стана позната локација каде што се снима популарната романтична серија „Off Campus”, базирана на романите на Ел Кенеди. Серијата раскажува за студенти, љубов и хокеј на измислениот универзитет „Брајар”, но целата приказна всушност е снимена овде, во провинцијата Британска Колумбија.

Главната локација е Универзитетот на Британска Колумбија, кампус опкружен со природа чии надворешни делови се отворени за посетители. Спортскиот центар на кампусот и арената „Пацифик Колизеум” ги одиграа хокеарските сцени, а еден луксузен бутик-хотел во центарот на градот стана „станот на Дин” од серијата. За фановите што сакаат да го прошетаат светот од екранот, мапата е речиси целосно достапна.

Но Ванкувер вреди и без серијата. Гастаун е историски кварт со калдрма, викторијански згради и познат часовник на пареа. Стенли Парк е огромен зелен простор опкружен со океан, со патеки, плажи и панорами што се памтат. Гранвил Ајленд, поранешна индустриска зона претворена во културно-гастрономски центар, нуди пазари, галерии и занаетчиски дуќани – спој на минато и сегашност каков што балканските градови ретко знаат да го направат.

За оние што бараат адреналин, висечкиот мост Капилано на 9 километри од градот се протега 137 метри над вековна шума, додека планините Граус и скијачкиот центар Вислер се на само два часа возење. Ванкувер не е евтина дестинација и не е близу – но е од оние места што објаснуваат зошто некои луѓе еднаш отидат и никогаш повеќе не гледаат на својот град на ист начин. Понекогаш филмската кулиса е поубава од самиот филм.