ХАОС ВО НЕБОТО НАД СКОПЈЕ: Силен ветер ги принуди авионите да бегаат од Аеродромот „Скопје“ – патници во паника, пилоти во борба со „невидливиот“ ветар

Седум авиони не успеаја да слетаат на Меѓународниот аеродром „Скопје“ во вторникот попладне, откако силниот ветер и комплексните метеоролошки услови создадоа сериозни пречки во авиосообраќајот. Од Контролата на летање за „Вечер“ потврдија дека нарушувањата ќе продолжат и во следните денови, бидејќи регионот е под влијание на интензивна фронтална активност која носи нестабилно време, засилен ветер и ризични услови за полетување и слетување.

Еден од авионите што кружел повеќе од еден час над Скопје предизвикал вистинска драма меѓу патниците. Некои од нив поради турбуленциите почувствувале силни стомачни тегоби и немир, а во моментите на неизвесност постојано биле во контакт со своите блиски, информирајќи ги за состојбата во воздухот и за можноста летот да биде пренасочен. Авионите од Истанбул и Венеција не успеале да воспостават стабилен приод кон пистата и биле пренасочени кон Приштина, додека два други лета кружеле со надеж дека ќе се отворат побезбедни услови за слетување.

Од М-Нав објаснуваат дека причината е појавата на засилено јужно струење во приземјето и на повисоките слоеви на атмосферата, а дополнителен проблем претставувала појавата на „wind shear“ – нагло смолкнување на ветерот што може да ја наруши стабилноста на авионот токму при најкритичните фази: полетување и слетување.

Метеоролозите предупредуваат дека „wind shear“ е опасен, но не и непредвидлив феномен. Брзите промени на правецот или брзината на ветерот, особено под влијание на судир на топли и ладни воздушни маси, можат за неколку секунди да создадат услови во кои пилотите имаат минимално време за реакција. Затоа, според нив, пренасочувањето кон алтернативен аеродром е најбезбедната опција.

Иако технологијата денес значително го намалува ризикот, стручњаците велат дека овој феномен останува „невидлива закана“ што службите ја следат со зголемено внимание. Патниците се повикуваат да ги следат известувањата од своите авиокомпании, бидејќи дополнителни одложувања и промени во распоредот се можни и во деновите што следат.