Долго ни велеа дека вештачката интелигенција ќе ни го олесни животот. Се покажува дека прво им го олеснува животот на измамниците. Google поднесе тужба против кинеска криминална мрежа наречена Outsider Enterprise, која продавала софтвер за фишинг „за почетници” – алатка со која секој, без никакво техничко знаење, може да краде пари во голем обем.

Бројките се вртоглави. Софтверот нудел над 290 готови шаблони што за минути произведувале лажни копии на вистински сајтови – на телеком оператори, банки, државни институции и трговци. Жртвите добивале лажни СМС-пораки и реклами што ги воделе на тие сајтови, каде што предавале лозинки, кодови за двостепена заверка и финансиски податоци – кои крадците ги читале во реално време.

Размерите се мерат во милиони. Само за две недели биле испратени 2,5 милиони пораки до корисници на Android, а во еден месец корисниците пријавиле 55.000 спам-пораки. Според оценките, од јули 2023 година измамите однеле околу 1,9 милијарди долари (1,65 милијарди евра), со украдени податоци од речиси 3,9 милиони платежни картички и десетици илјади картички од институции во 95 земји.

Најнепријатниот детал за самиот Google: измамниците ја користеле и неговата сопствена алатка Gemini за да генерираат код и да градат лажните сајтови побрзо. Компанијата што ја гради вештачката интелигенција сега тужи затоа што истата таа технологија ѝ се врти против корисниците. Тужбата бара отштета и забрана, обвинувајќи ги сторителите за изнуда, измама и злоупотреба на трговски марки.

Поентата не е во една кинеска мрежа – таа ќе ја смени адресата за месец. Поентата е што алатките за измама станаа толку едноставни што веќе не треба хакер, треба само некој без срам. А прашањето што останува виси над сите нас: кога технологијата ќе го направи криминалот лесен колку нарачка храна преку апликација, кој ќе нè штити – истите компании што ги изградија алатките?