Мјузиклот „Као какао“ се враќа на сцената на Македонскиот народен театар на 19 октомври во 20 часот. Тоа е мелодрамска љубовна приказна сместена во Скопје во седумдесеттите, раскажана низ 19 препознатливи композиции на Влатко Стефановски, со нови аранжмани подготвени специјално за оваа продукција.

Текстот и драматургијата ги потпишува Венко Андоновски, режисер е Дејан Пројковски, а музичките аранжмани и оркестрацијата се на Бобан Мирковски. Кореографијата е на Олга Панго, сценографијата на Валентин Светозарев, костимите на Марија Пупучевска. Продуцент е Баги Комуникации, а копродуцент МНТ.

Во актерската екипа се Владимир Петровиќ, Катерина Јовановиќ, Нина Елзесер, Стефан Спасов и Ања Митиќ, меѓу повеќе од дваесет имиња. Ликовите се генерација што сака да успее, да сака и да остане своја во време што не ѝ дава многу простор – судирот со системот и околината на Балканот се препознава без објаснување. Во август мјузиклот гостуваше и во Охрид.

Билетите почнуваат од 1.100 денари и се продаваат преку wayin.mk.