Такер Карлсон, човекот кој му помогна на Доналд Трамп да стигне до Белата куќа, јавно се извини на цела Америка. „Долго ќе ме мачи фактот дека играв улога во изборот на Трамп,” изјави во подкаст со својот брат Бакли, поранешен говорописец на Трамповата кампања од 2016 година.

Карлсон призна дека тој и милиони Трампови поддржувачи биле заслепени од политичкиот ентузијазам и превиделе сериозни предупредувачки знаци. „Јас и ти, и сите кои го поддржавме, сигурно сносиме дел од одговорноста за ова,” рече Карлсон.

Од најгласен поддржувач до најгласен критичар

Карлсон не застана на извинувањето. Тој директно го обвини Трамп дека неговата „вера” повеќе наликува на „израелизам” отколку на христијанство, а војната на САД и Израел против Иран ја осуди како водена „во име на Израел.” Тешки зборови од човек кој некогаш беше Трамповиот најголем медиумски сојузник.

Браќата Карлсон отворено дискутираа дали Трамп ја планирал војната против Иран од почеток и дали ги напуштил клучните ветувања од кампањата. Посебно внимание доби донацијата од 250 милиони долари од казино-магнатот Миријам Аделсон за Трамповата кампања. Кога толку пари влегуваат од една страна, прашањето „кој ги повлекува конците” престанува да биде теорија на заговор.

Карлсон не е единствен. Маргори Тејлор Грин, Џо Роган, Кендис Овенс и Алекс Џонс – сите тие, некогаш Трампови гласни поддржувачи, сега се дистанцираат. Трамп одговори со лични напади, нарекувајќи ги критичарите „глупави луѓе” со „низок коефициент на интелигенција.”

А Израелското министерство за дијаспора го стави Карлсон на листата на десет водечки „антисемитски и антиционистички” влијателни лица за 2025 година. Од Трампов сојузник до израелска црна листа – политичката траекторија на Карлсон е лекција за тоа колку брзо можеш да паднеш кога ќе почнеш да зборуваш против оние кои те направија моќен.