Украинскиот Трет армиски корпус соопшти дека во рамките на операцијата „Вивалди“ за прв пат извел десант на копнени роботи во заднината на руските сили. „Третиот армиски корпус прв во светот изведе маневар на заобиколување, спушти копнени роботи зад непријателските линии и ги „ослепе“ руските дронови“, стои во соопштението објавено на Телеграм, пренесено од Укринформ.

Според корпусот, тешки бомбардерски дронови ги исфрлиле роботските копнени системи наменети за напади длабоко во противничката територија, додека руските дронови над зоната биле попречувани од противвоздушната одбрана и системите за електронско војување. Целта, велат тие, е пешадијата помалку да се изложува на ризик. Во превод: пред човек да влезе во ров, прво влегува машина.

Командантот на корпусот, бригадниот генерал Андриј Билецки, порано истиот ден соопшти дека во операцијата „Вивалди“ украинските сили ги зазеле населбите Шандриголово и Дерилово и воспоставиле целосна контрола над Дробишево во Донецката област. Освоени села и светска премиера во исто соопштение – добар ден за ПР-службата на корпусот. Колку од маневарот е воена иновација, а колку воена реторика, ќе покаже фронтот, не Телеграм.

Она што не е реторика е трендот: роботи на земја, дронови во воздух, електронско војување што ги ослепува и едните и другите. Балканот војната ја памети со пешадија, артилерија и ровови. Дали некоја армија во регионот воопшто тренира за војна во која првиот што ја преминува линијата нема пулс?