Молика – петоиглениот бор што е симбол на Пелистер и едно од најпрепознатливите ендемични дрвја на Балканот – конечно добива стручна заштита. Владата формираше експертска група која почна со работа во Битола, со задача да изработи долгорочни решенија за заштита и обнова на моликовите шуми, еден од најзначајните природни екосистеми во регионот.

Групата, составена од претставници од шумарството, екологијата и науката, мора да достави конкретни препораки до крајот на август 2026 година, а стратешките програми ќе стартуваат во 2027. Директорот на Националниот парк Пелистер, Иванчо Тошевски, нагласи дека новите документи мора да ја „утврдат здравствената состојба на шумите”, да ги идентификуваат причините за пропаѓањето на дрвјата и да определат мерки за одржливо управување.

Заканата не е апстрактна. За време на зимата 2024/2025 година, силни ветрови и обилен снег нанеле сериозна штета. Анализите покажале остарени делови од шумата и тешка природна обнова на одредени површини. А моликата на Пелистер не е кое било дрво – тоа е единствениот шумски комплекс од таков обем на целиот Балкан. Кога губиш такво нешто, не го губи само Пелистер, туку регионот.

Во последните 18 месеци, околу 100 хектари поминале низ третман – отстранување на болни и мртви дрвја за подобри услови за раст. Професорот Благој Шурбевски од Шумарскиот факултет вели дека се потребни „детални студии” за да се дефинираат ефективни мерки. Сето тоа звучи стручно и охрабрувачки. Прашањето е само дали препораките до август ќе останат на хартија или ќе се претворат во дрвја – бидејќи моликата не чита извештаи, таа или расте или пропаѓа.