Министерот за надворешни работи Тимчо Муцунски на Дипломатскиот форум во Анталија одржа повеќе билатерални средби со свои колеги, фокусирајќи се на европската перспектива и регионалната поврзаност. Коридорите 8 и 10, кои минуваат низ Македонија, ги нарече „клуч за регионален развој и економска отпорност”.

Звучи амбициозно. Но додека Муцунски зборува за коридори, Македонија сè уште нема автопат до Охрид, а железничкиот сообраќај личи на музејски експонат. Вложувањето во младите е „директна инвестиција во иднината на регионот”, изјави министерот – реченица која би значела многу повеќе кога 30.000 млади годишно не би заминувале од земјата.

Форумот, одржан од 17 до 19 април, собра делегации од над 150 земји. Муцунски учествуваше и на Балканската платформа за мирот – иницијатива за регионална безбедност и стабилност. За Македонија, присуството на ваков форум е добро за видливост. Прашањето е дали од фотографиите во Анталија ќе следуваат конкретни проекти – или ќе останат уште едно поглавје во балканската книга на ветувања.