Просторот над плоштадот „Скендербег” во Чаир ќе се претвори во модерна албанска библиотека. Проектот го најави градоначалникот на општината, Изет Меџити, на затворањето на Саемот на албанската книга во Скопје – како место наменето за студенти, истражувачи и сите граѓани заинтересирани за образование и култура.

Според најавите, библиотеката ќе биде мултифункционален простор со современи услови за читање, учење и истражување. Фондот ќе вклучува литература на албански јазик, но и изданија на други јазици, што би ја направило достапна за поширока публика. „Започнуваме процес да го претвориме просторот над плоштадот Скендербег во модерна библиотека, отворена за студентите и сите граѓани”, изјави Меџити.

Идејата сама по себе е добра – секој град што гради библиотеки наместо што ги затвора, оди во вистинска насока. Книгите, без оглед на јазикот, се поинвестиција од многу побомбастични проекти. Прашањето што останува е чисто практично: какви се точните архитектонски планови, кој ќе го финансира и кога ќе биде готова.

Затоа е добро да се поздрави намерата, но и да се чека реализацијата. Во земја каде што најавите често живеат подолго од самите проекти, вистинската мерка не е прес-конференцијата, туку отворените врати на готовата зграда. Дотогаш, една библиотека повеќе во плановите е добра вест – но само план.