ОБСЕ го пофали обвинителството за транспарентност, но предупредува: без кадар и пари нема подобри резултати

ОБСЕ има пофалби за македонското обвинителство и за Кривичниот суд во Скопје. Има и една реченица што вреди повеќе од сите пофалби заедно: без луѓе и пари, подобри резултати нема.

Извештајот од набљудувањето на судските постапки во Западен Балкан беше претставен на регионална конференција во Будва, Црна Гора, под наслов „Од хартија до практика: Како реформите во правосудството да дадат резултати во предметите на организиран криминал и корупција“. Таму беа јавниот обвинител Елвин Вели, претседателот на Советот на јавните обвинители, Башким Бесими, и обвинителката од Обвинителството за гонење организиран криминал и корупција, Наташа Поп Трајкова, како и судии од Основниот кривичен суд Скопје.

Во Македонија биле набљудувани 72 судски предмети, 16 за организиран криминал и 56 за корупција, што според обвинителството е најголемиот број во регионот. Обвинителството добива високи оценки за транспарентноста во предметите од голем јавен интерес, за усвоената комуникациска стратегија и за практиката на соопштенија, резимеа и брифинзи. Во неколку предмети, обвинителите активно го планирале судењето, предлагале реални распореди за изведување докази и презеле одговорност за повикување на своите сведоци.

Кривичниот суд Скопје е пофален како единствената институција во судската мрежа со функционална канцеларија за односи со јавноста, за кварталниот билтен со статистика и резимеа на пресуди и за брифингот со медиумите во септември.

Делот што не влезе во насловите

Извештајот, сепак, укажува на недоволни човечки и финансиски ресурси во обвинителството. „Се чини дека ова е едно од најкритичните прашања што бара паралелен пристап: континуирани напори од страна на обвинителството за подобрување на ефикасноста, во комбинација со соодветна институционална поддршка и обезбедување ресурси“, се наведува во документот. Со други зборови, од обвинителите се очекуваат подобри резултати пред да им се обезбедат условите за нив.

Транспарентноста е добредојдена, но граѓаните не ги мерат институциите по бројот на соопштенија. Ги мерат по пресудите за организиран криминал и корупција. Колку од тие 72 предмети ќе завршат со правосилна пресуда – тоа е оценката што ќе значи нешто.