Кога претседател на најмоќната земја на светот го слави својот 80-ти роденден со октагон за борба среде дворот на Белата куќа, тоа веќе не е роденденска забава – тоа е претстава за тоа како изгледа моќта кога нема кој да ѝ каже „доста”. Доналд Трамп ја прославува осумдесеттата на 14 јуни, спакувана како почеток на одбележувањето на 250 години американска државност.

Настанот, наречен „УФЦ Фридом 250″, се проценува на 60 милиони долари само за продукција и осветлување во боите на знамето. На списокот – околу 5.000 ВИП гости чии имиња се чуваат во строга тајност: банкари од Волстрит, магнати од Силиконската долина, холивудски лица блиски до Трамп, конгресмени и семејства на воени ветерани. Поканата е опишана како „најбараниот пропусник на планетата”. Скромност, очигледно, не е дел од менито.

А менито е тема за себе. За ВИП ложите – Вагју говедско и фино јадење; за домаќинот – неговите омилени гурмански хамбургери, премиум виршли и пилешки прсти. Џиновска роденденска торта, шампањ за гостите, а Трамп, верен на доживотното воздржување од алкохол, ќе пие Diet Coke. Главната спортска точка е борбата на шпанско-грузискиот борец Илија Топурија, кој ја брани светската УФЦ титула против Американецот Џастин Гејџи – детал што забавата ја прави интересна и за публиката надвор од САД.

Има и комични страни што ниту најдобар сценарист не би ги измислил. Борците излегуваат од Овалната соба и слегуваат во градината, мерењето пред борбата е на скалите на Линколновиот меморијал, а прогнозата најавува 65 проценти шанса за дожд и комарци привлечени од телевизиските рефлектори покрај реката Потомак. Шефот на УФЦ Дана Вајт изјави дека ќе откажат само „ако нè удри гром”. Се прашувате каде одат парите и вниманието на најмоќната држава – еве, во октагон на тревникот, за еден роденден.