Норвешката принцеза Мете-Марит е оперирана – доби трансплантација на бел дроб во Националната болница во Осло. Операцијата е одговор на хронична белодробна болест од која страда со години, за која се разбира дека е белодробна фиброза. Дворот соопшти дека досега зафатот поминал успешно, но дека ова е дури првиот чекор во долго и тешко лекување.

Влошувањето беше видливо со месеци. Принцезата сè почесто отсуствуваше од официјалните обврски, а кога се појавуваше, носеше кислород за да издржи. На прославата за Денот на државноста во мај годинава делуваше исцрпено, со постојана кашлица – сликата што секој можеше да ја прочита и без официјална дијагноза. Кога една јавна личност толку долго се појавува со маска за кислород, прес-соопштенијата за „добра форма” престануваат да убедуваат некого.

Шефот на торакалната хирургија Арна Фиане изјави дека „досега трансплантацијата е успешна”, а раководителот на пулмологијата Аре Холм појасни дека принцезата ќе остане во болница уште неколку недели – стандардна процедура за прилагодување на терапијата и рехабилитација. Принцот Хакон ја откажа агендата за да биде покрај неа.

Зад протоколарната смиреност на секој двор стои иста човечка реалност што не бира адреса. Болеста не прашува за титула, а трансплантацијата на бел дроб е тешка операција за секого – принцеза или не. Норвешкиот двор со години гради имиџ на скромна, блиска монархија; начинот на кој ќе ја пренесе оваа криза ќе покаже колку тој имиџ е вистински, а колку само добро управувана слика.