Почетокот на октомври ќе донесе значителна промена на времето низ целиот континент. По периодот на потопол западен воздух, воспоставувањето на силен антициклон на северот од Европа отвори пат за навлегување на ладни воздушни маси од исток. Според прогнозата на метеоролозитеe, токму оваа недела се очекува првиот сериозен студен бран на есента.

Од средината на неделата ќе се развие невообичаено силен продор на студ. Температурите ќе паднат и до 10 степени под сезонскиот просек, што ќе го означи најстудениот период досега во метеоролошката есен. Продорот ќе биде придружен со силни врнежи од дожд по должината на западниот Балкан, пообилен снег на планините и првиот мраз во низините.

Метеоролошкиот модел познат како „Рекс блок“, кој се формираше кон крајот на септември, создаде услови за ваквата промена – антициклон во северна Европа и циклон кој од западна Украина се движи кон југозапад. Овој распоред овозможува студената маса да се шири кон запад и југ во текот на следните денови. Врвот на студениот бран се очекува меѓу четврток и сабота, кога температурите ќе бидат за 8 до 12 степени, а локално и до 15 степени пониски од нормалните вредности.

Најизразени промени ќе почувствуваат Германија, Чешка, Словачка, Полска, Австрија, Унгарија, Романија, Италија, Словенија, Хрватска и земјите од Западен Балкан. Во многу региони температурите за прв пат оваа есен ќе се спуштат близу или под нулата.

Во четврток и петок наутро во Централна Европа се очекува појава на прв мраз во низините, додека Балканот ќе биде најстуден за време на викендот. Во Горски Котар ќе се спуштат до -2 до -4 степени, а во Босна и Херцеговина, Црна Гора и Србија термометрите би можеле да покажат и до -6 степени.