На 97 години почина Леди Памела Хикс – братучетка на принцот Филип, доверливо лице на кралицата Елизабета Втора и една од последните живи сведоци на едно време што веќе не постои. Нејзината ќерка, дизајнерката Индија Хикс, ја објави веста, опишувајќи ја мајка си како жена што до крајот задржала „беспрекорен стил, бистар ум и природен шарм”. Ја нарече „навистина последната од својата класа”.

Зад тие зборови стои цел еден свет. Памела беше ќерка на Лорд Луис Маунтбатен, последниот вицекрал на Индија, и порасна меѓу Англија, Малта и Индија, следејќи ги воените и дипломатските должности на татка си. Како дете го гледаше распадот на Британската империја однатре – не од учебник, туку од салоните каде што се одлучуваше.

Во 1947 беше деверуша на венчавката на тогашната принцеза Елизабета со принцот Филип. А во февруари 1952, кога беше во Кенија со Елизабета, стигна веста дека кралот Џорџ Шести починал – Памела беше меѓу првите што го видоа моментот кога една млада жена преку ноќ стана кралица. Беше таму и на крунисувањето во 1953, и на безброј приватни семејни моменти низ децениите што следеа. Дискретна, постојана, секогаш во вториот план – токму местото од кое најмногу се гледа.

Се омажи за дизајнерот на ентериери Дејвид Хикс во 1960 и имаше три деца. Подоцна напиша мемоари – „Ќерка на империјата” и „Индија, сеќавања” – книги во кои не раскажуваше за себе колку за светот што го гледаше како исчезнува. Затоа нејзината смрт не е само семејна загуба. Со неа си заминува жив архив на еден поредок, и потсетник дека и најголемите империи на крајот стануваат сеќавање во устата на неколку старци што ги паметат.