Шпанскиот премиер Педро Санчез вели дека не верува во медиумските извештаи дека САД размислуваат да го замрзнат членството на Шпанија во НАТО. „Не работиме врз основа на мејлови, туку врз официјални документи и позиции формулирани од американската влада”, изјави тој пред средбата со лидерите на ЕУ на Кипар.

Шпанската влада се противи на војната на САД и Израел против Иран од крајот на февруари. Тоа го разлути Трамп, кој го критикуваше Мадрид затоа што одби да дозволи користење на американските воени бази во Андалузија за воздушни удари, дури заканувајќи се да ја „запре целата трговија” меѓу двете земји.

Анонимен американски функционер претходно изјави за меѓународни агенции дека Пентагонот наводно разгледува опции за санкционирање на одредени НАТО сојузници поради нивниот став кон американските операции. Меѓу опциите: суспензија на Шпанија од алијансата.

НАТО – алијанса создадена за колективна одбрана – сега дискутира за суспензија на членка затоа што одбила да учествува во офанзивна операција? Ако ова е вистина, тоа ја менува суштината на она што НАТО значи. А ако не е – некој пушта „случајни” мејлови со многу конкретна цел.