Sierra – стартапот на Брет Тејлор, поранешен ко-CEO на Salesforce и сега претседател на бордот на OpenAI – собира нова рунда од 950 милиони долари предводена од Tiger Global и GV. Со ова, проценетата вредност на компанијата надминува 15 милијарди долари, а во каса има повеќе од 1 милијарда долари за работа.

Тоа е огромна сума за четиригодишен стартап, но цифрите за приходи го оправдуваат потегот. Sierra ja достигна границата од 100 милиони долари годишен повторлив приход во ноември лани, а само три месеци подоцна, во февруари, бројот скокна на 150 милиони. Експоненцијалниот раст не е мит – Sierra тврди дека веќе има над 40 проценти од Fortune 50 како клиенти.

Што всушност прави нивната платформа? Агенти кои води милијарди интеракции – рефинансирање хипотеки, обработка на штети од осигурување, управување со враќања на производи и водење кампањи за непрофитни организации. Со други зборови – Sierra сака да ги замени корпоративните контакт центри со AI агенти што не „одговараат скриптирано”, туку решаваат целосни задачи од почеток до крај.

На неодамнешен StrictlyVC настан, Правин Непали Нага, CTO на Uber, опиша како компанијата „го пробила буџетот за AI” откако ги отвори вратите за агентски алатки. Околу 10 проценти од нивниот код сега се генерира автономно низ околу 8.000 инженери. Еден тим заврши интеграција за хотелски резервации за 6 месеци – проект кој вообичаено би траел година. Тоа е цифрата што инвеститорите ја читаат како сигнал дека пазарот созрева.

Тејлор претходно изјави дека најдобриот резултат на агентски AI се пониски трошоци и повисоки приходи кај клиентите – но фазата на „напумпување” е скапа. Тоа е дипломатски начин да се каже – сè уште е скапо, и треба време. Прашањето на следните 18 месеци не е дали Sierra има клиенти – тие веќе имаат, и во доволен број – туку дали може да го одржи растот од 50 проценти за три месеци без да го изгуби квалитетот на услугата. Балканската компанија која мисли дека ќе се натпреварува со Sierra по цена ќе изгуби. Онаа што мисли дека ќе се натпреварува со специјализација на одредена индустрија – можеби има шанса.