Сојузот на синдикати на Македонија (ССМ) остро реагира на одлуката на Владата минималната плата да остане 397 евра до март 2026 година, со минимално усогласување од едвај 1.600 денари. Од ССМ предупредуваат дека Македонија веќе е убедливо последна во регионот по износ на минималната плата, додека сите соседни земји најавуваат значајни и конкретни растови.

Во Косово, минималната плата се зголемува од 350 на 500 евра во две фази до јули 2026. Во Албанија, од 1 јануари 2026 година, минималците ќе земаат 500 евра, а Владата дополнително ќе покрива осигурување за приватниот сектор — токму она што ССМ го бараше. Србија веќе ја крена минималната плата на 500 евра, а од 2026 ќе биде 550.
Во Република Српска минималната плата ќе се движи од 512 до 743 евра, зависно од степенот на образование. Во Босна и Херцеговина минималната плата за 2025 година изнесува 511 евра, додека во Црна Гора достигнува 600, односно 800 евра за работници со високо образование.

Во таков контекст, велат од ССМ, е „жалосно и понижувачки“ што Владата има поддршка од дел од работодавачите и од синдикатот КСС, кој – според објавата – е туркан да стане репрезентативен само за да го блокира зголемувањето на платите. „Како папагали повторуваат дека треба само да се почитува законот“, реагираат од ССМ.

Синдикатот потсетува дека организирал низа протести и дека ќе продолжи со притисок, предупредувајќи дека игнорантскиот однос на работодавачите може да доведе до генерален штрајк. „Денеска имаме Влада, газди и КСС кои стојат на една страна – против работниците, задоволни што Македонија има најниска минимална плата во регионот“, стои во соопштението.

Од ССМ додаваат дека функционерските плати не се намалени и остануваат зголемени за 79%, додека пратениците со над 2.000 евра месечно ќе дискутираат за Буџетот за 2026 и ќе „убедуваат дека работниците со 397 евра добро живеат“, иако токму тие имаат моќ да ги променат законите.

„Затоа се бориме“, порачува ССМ.
Се бориме затоа што работникот заслужува достоинствена плата.
Се бориме затоа што регионот оди напред, а Македонија ги турка работниците назад.
Се бориме затоа што без работник – нема економија.
Се бориме затоа што 397 евра не се живот, туку борба за преживување.

И битката продолжува – сѐ до зголемување на минималната плата и достоинство за секој работник.