Србија разгледува можност за соработка со Русија во областа на онколошките терапии, вклучувајќи и потенцијален развој и примена на вакцина против рак, објави српскиот министер на својот профил на Инстаграм.

„Србија е заинтересирана за овој најнапреден вид терапија, а потенцијалната соработка со нашите руски партнери претставува огромен чекор кон подигнување на стандардите за дијагностика и лекување во нашата земја,“ напиша тој.

Министерот во Белград одржа средба со Александар Гинцбург, директор на Националниот истражувачки центар за епидемиологија и микробиологија „Гамалеја“, и со Андреј Каприн, генерален директор на Националниот медицински истражувачки центар за радиологија. Средбата ја оцени како „одлична и перспективна“.

Тој додаде дека инвестирањето во најсовремени онколошки решенија и пристап до иновативни терапии е еден од приоритетите на Србија, особено кога станува збор за брза и сигурна дијагностика и превенција на малигни заболувања.

„Ја изразив целосната подготвеност на нашата земја за континуирана соработка што може да придонесе за развој, производство и примена на оваа вакцина во Србија, почитувајќи ги највисоките светски стандарди за безбедност и етика,“ порача тој.