На седница на Советот за безбедност, постојаниот претставник на Украина во ОН Андриј Мелник го кажа она што многумина во таа сала го мислат, а никој не го изговара: ако на Русија толку ѝ пречат одлуките на Обединетите нации – вратата е таму.

„Дозволете ми да дадам предлог. Ако Русија се чувствува толку непријатно поради резолуциите на Генералното собрание што бараат безусловно повлекување на нејзините трупи, поточно воени злосторници, од украинска територија, ако Русија ги отфрла независните извештаи на ОН што ја разоткриваат нејзината варварска политика – тогаш можеби е време да се поздрави и да ги напушти Обединетите нации”, изјави Мелник.

Барањето не застана на реторика. Мелник побара руските сили да бидат отстранети од сите мировни и полициски мисии на ОН, потсетувајќи дека Русија три пати по ред се најде во извештаите за деца и вооружени конфликти, како и на списоците на страни вмешани во сексуално насилство во конфликти. Земја на тие списоци да патролира како „мировник” – тоа е иронија што и бирократијата на ОН тешко ја голта.

„Не мислам дека некој во оваа сала ќе пушти солза ако Русија ја тресне вратата и си замине. Секој ден рускиот претставник ни плука в лице со постојани лаги”, додаде украинскиот дипломат, кој побара и поддршката за украинската противвоздушна одбрана да се зголеми „барем десеткратно, а уште подобро – дваесеткратно”.

Реално, Русија нема да ја напушти ОН – столчето со право на вето во Советот за безбедност е премногу вредно за да се остави од инает. И токму тоа е поентата на Мелник: предлогот не е план, туку огледало. Систем во кој земја под санкции и со списоци полни обвинувања седи на масата што одлучува за мирот – тоа е систем што самиот се исмева. А ние на Балканот добро знаеме како изгледа кога големите си ги толкуваат правилата по своја мерка.