Зоран Заев се појави на прославата за 35 години СДСМ – пет минути пред крајот, откако завршија сите говори и музиката. „Шо праите бе другари”, рече со насмевка и доби аплауз. Следеа прегратки, фотографии и познатата фамилијарност. Заев дошол од промоција на документарен филм во Скопје – секогаш има добра причина за доцнење.

Пред него, претседателот на СДСМ Венко Филипче одржа говор во кој ја нарече партијата „големата идеја за Македонија” и потсети на клучните моменти – независноста, Охридскиот рамковен договор, членството во НАТО. „СДСМ е подготвена за избори кога и да треба”, рече Филипче, додавајќи критики кон она што го нарече „лажен патриотизам”.

На прославата дојдоа и Бучковски и Зечевиќ, но отсуствуваше Бранко Црвенковски – детаљ кој не помина незабележано. Партија од 35 години со повеќе поранешни лидери отколку актуелни идеи? Или организација која, и покрај сè, продолжува да егзистира додека другите се распаѓаат?

Заев го направи она во што е најдобар – дојде доцна, направи сцена, и си замина. Прашањето е дали неговото присуство на Бихачка е знак за враќање, или само ностал­гичен пикник. СДСМ слави 35 години, но нејзините најголеми достигнувања – НАТО членството, Преспанскиот договор – остануваат контроверзни кај јавноста. Дали роденденот е повод за слава или за преиспитување?