Роботаксито на Zoox – фирмата за автономни возила во сопственост на Amazon – се збуни пред густ чад на местото на пожар и застана насред активна интервенција. Резултатот: софтверско повлекување на целиот возен парк од 105 роботаксија. Автомобилот што сам вози очигледно не знаел што да прави кога видливоста исчезнала, а околу него горело.

Инцидентот се случил на 20 јуни. Според извештајот до американската агенција за безбедност во сообраќајот (NHTSA), возилото „наишло на густ чад што прикривал активна пожарна интервенција што не била оградена со конуси”. Роботаксито нагло сопрело додека се обидувало да сврти настрана, па потоа целосно застанало. Дури откако човек-оператор од далечина го вратил возилото наназад, противпожарните екипи можеле да постават конуси околу местото. Патници немало во возилото, а Zoox пријавила дека немало повредени.

Одговорот на регулаторот беше остар. Џонатан Морисон, шефот на NHTSA, беше директен: „Да бидам јасен – неспособноста да се откријат и соодветно да се одговори на вакви ситуации претставува функционален недостаток. Местата на итни интервенции не се ретки или екстремни гранични случаи.” Со други зборови – тоа не е чуден исклучок што ниту еден инженер не можел да го предвиди, туку токму сценариото за кое едно возило без возач мора да биде подготвено.

Zoox тврди дека ова е „единствениот настан од ваков вид” што фирмата го доживеала и дека спровела истрага за причините. Одлуката за повлекување е донесена на 7 јули, а софтверската надградба сега додава способност возилото да препознае густ чад во одредени ситуации. Прашањето е поинакво: колку вакви „единствени настани” ни се потребни додека автономните возила научат да го препознаат она што секој човек-возач го гледа инстинктивно – дека кога пред тебе гори и се дими, не се влегува право во чадот.