Meta ги пушти првите глобални платени претплати за Instagram, Facebook и WhatsApp – чекор кој компанијата го најави како „приоритет за нови корисници”, а во пракса е признание дека растот на огласни приходи се исцрпува. Цените: Instagram Plus и Facebook Plus по 3,99 долари месечно, WhatsApp Plus 2,99 долари.

Што добиваат претплатниците? Аналитика за стори содржини, продолжен век на стори (24 часа повеќе), невидливо прегледување на стори, директно објавување од профил, прилагодени икони и фонтови за био. WhatsApp Plus нуди прилагодени теми за апликацијата, ѕвонења и стикери. Со други зборови – функции што секоја слична апликација веќе ги има бесплатно, спакувани во претплата.

Поамбициозни се ВИ-плановите кои се тестираат во Сингапур, Гватемала и Боливија: Meta One Plus за 7,99 долари и Meta One Premium за 19,99 долари месечно, со подобар модел и поголема компјутерска моќ. За креатори и бизниси, тестирањето во Саудиска Арабија, Мароко, Тајланд и Бангладеш нуди план од 14,99 до 49,99 долари – со сертификација, заштита од лажни профили, и засилување во алгоритмот.

Поентата на Meta е јасна: компанијата веќе има 3,5 милијарди корисници. Кога не можеш да растеш во ширина, растеш во длабочина – наплати ги оние кои се веќе тука. Прашањето за Балканот: колку корисници ќе платат 4 долари месечно за поголема контрола на стори? Веројатно малку, барем додека функциите не станат услов наместо додаток.