Околу 21 часот по источноамериканско време на 28 мај, мегаракетата New Glenn на Blue Origin експлодираше на стартниот комплекс 36 во Кејп Канаверал, Флорида, за време на статичен тест со полно гориво (без полетување, само палење на моторите на земја). Никој не настрада. Програмата – падна.

Од компанијата кратко соопштија дека „сите вработени се пронајдени”. Џеф Безос се огласи лично: „Премногу е рано да се знае коренот на причината, но веќе работиме на тоа. Многу тежок ден, но ќе го изградиме повторно”. Од NASA, директорот Џаред Исакман најави соработка со партнерите за темелна истрага. И Илон Маск се огласи со една од оние реченици што воедно се сочувство и потсетник: „Многу несреќно. Ракетите се тешки. Се надевам дека ќе се опоравите брзо”.

Цената на овој неуспех е поголема од една ракета. Дванаесет лансирања се планирани за 2026, со 24 договорни лансирања за сателитската мрежа Amazon Leo. Тие ќе се одложат, или Безос ќе мора да ги предаде на друг превозник – најверојатно SpaceX. На исто потенцијално движење се и мисиите за месечева програма Artemis на NASA и националните безбедносни договори на Пентагон.

Конкуренцијата меѓу Blue Origin и SpaceX деновиве се решаваше со одредени бројки на лансирања. Денес се реши со една експлозија. Маск може да си дозволи дипломатија – не мора да напаѓа, доволно е да чека. За Безос ова е приказна со јасен заклучок: пари не недостасуваат, време недостасува. И времето сега работи против него.