Одборникот Миливоје Брковиќ, функционер на Уједињена Црна Гора и одборник на коалицијата „За иднината на Подгорица”, повторно е во болница и животно загрозен – една недела откако беше брутално претепан во Подгорица затоа што застанал во одбрана на жена од двајца насилници.

Според извори на ТВПГ, на Брковиќ му се слошило пред два дена, по што следувала итна хоспитализација. Дијагнозата: белодробна емболија, за која лекарите се сомневаат дека е директна последица од ударите при нападот. „Брковиќ останува животно загрозен и прима терапија за згрутчувањата на крвта што се појавија и што може да предизвикаат сериозни компликации”, јавува ТВПГ.

А сега најважниот дел од приказната: напаѓачите, Миша Вешовиќ и Томислав Шќепановиќ, и по седум дена се на слобода. Полицијата, според незванични информации, собрала снимки од околните камери – но сторителите „сè уште им бегаат на властите”. Во град со големина на Подгорица, двајца познати на полицијата луѓе се невидливи цела недела. Како?

Партијата на Брковиќ соопшти дека тој бил нападнат додека се обидувал да помогне на сограѓанка која побарала помош – прво бил удрен со метален предмет до бессознание, а потоа тепан на улица. Здобил тешки телесни повреди. Демократската народна партија побара итно апсење, нагласувајќи дека сторителите се „безбедносно интересни лица” со криминално досие – што го прави нивното бегство уште понеобјасниво.

Случајот ја крена црногорската јавност на нозе, а политичките партии бараат итна реакција на полицијата и обвинителството. И со право: кога човек што застанал да одбрани жена на улица завршува двапати во болница, а тие што го претепале шетаат слободни – пораката до секој следен минувач е јасна. Не застанувај. Не помагај. Гледај си го патот. Тоа е порака што ниту едно општество на Балканот не смее да си ја дозволи – а ја препознаваме сите, зашто никаде не е само црногорска.