Северна Ирска гори – буквално. По нападот со нож во северен Белфаст, за кој е обвинет 30-годишен маж од Судан, маскирани толпи ноќва палеа куќи, автобуси, автомобили и барикади низ повеќе делови на градот. Снимките на друштвените мрежи прикажуваат домови во пламен и брзи помошти и пожарникари што се пробиваат низ улиците.

Поводот е вистински и страшен: во понеделник навечер, маж во четириесеттите години е нападнат со нож – сведок ја снимил сцената како напаѓачот го притиска крвавиот човек на земја и повторно го напаѓа, додека минувачи и полиција не интервенирале. Жртвата е во критична состојба, со оштетено око и тешки повреди на грбот и лицето. Премиерот Кир Стармер нападот го нарече „ужасен”, а полицијата соопшти дека засега нема докази оти станува збор за тероризам.

Осомничениот, кој во февруари 2023 долетал од Париз во Даблин и оттаму влегол во Северна Ирска, побарал азил и добил престој во Обединетото Кралство до 2028. Обвинет е за обид за убиство, носење сечило на јавно место и закани со смрт, а пред суд излегува во средата.

Но она што следуваше по нападот е приказна за себе. Немирите се прелеаја во соседниот Њутнаби, каде што демонстранти запалија два автомобила, и во Килкил, а протести се регистрирани и низ Англија, Велс и Шкотска. Првата министерка Мишел О’Нил беше дирек: маскирани групи „истераа семејства од нивните домови палејќи ги” – сцени на „чист вандализам”.

И тука е јадрото на работата: едно злосторство на еден човек, а одговорот е палење куќи на луѓе што со нападот немаат ништо. Кој точно е заштитен кога гори туѓ дом? Гневот по ваков напад е разбирлив – толпата со факели не е правда, туку второ злосторство – овој пат врз невини луѓе. Тоа го знае секој на Балканот што гледал како колективната вина пали куќи. Видовме како завршува.