Два дена по локалните избори, славеничката атмосфера во партиските штабуови стивнува, а во фокусот се анализите и подготовките за вториот круг на 2 ноември. Резултатите од првиот круг, сепак, покажаа сериозни причини за загриженост — речиси половина од избирачите решија да останат дома, а бројот на неважечки ливчиња е рекорден.

Според податоците на Државната изборна комисија, секое шеснаесетто ливче било неважечко — вкупно 53.713 гласови, односно 6,1% од вкупниот број. Само во Град Скопје имало над 12.000 неважечки ливчиња. За споредба, на локалните избори во 2021 година имало 37.859 неважечки гласови, а сега бројката е речиси двојно поголема.

На овие избори право на глас имаа 1.832.415 граѓани, но излегле само 885.085 — што е излезност од 48,3%. Во четири општини — Гостивар, Маврово и Ростуше, Врапчиште и Центар Жупа — изборите ќе се повторат поради недоволен цензус.

ВМРО-ДПМНЕ прогласи „историска победа“, освојувајќи над 301 илјада гласови на советничките листи, што е два и пол пати повеќе од СДСМ, кои освоија околу 125 илјади. Партијата најави дека овој резултат е 50% подобар од оној во 2021 година, кога доби 22 градоначалници во прв круг — а сега има 33.

Од СДСМ, пак, велат дека ВМРО-ДПМНЕ изгубиле 140 илјади гласови во однос на парламентарните избори во 2024 година и дека разликата меѓу двете партии се намалува. Левица освои над 57 илјади гласа, а партијата ЗНАМ — повеќе од 38 илјади.

Политичкиот аналитичар Сефер Селими предупредува дека првичната еуфорија кај партиите е моментална и дека бројките ја покажуваат реалната слика на теренот: „Еуфоријата е емоционална состојба на триумф, често посилна од реалноста — но не трае долго,“ напиша тој.

Во албанскиот политички блок продолжува борбата за превласт меѓу ДУИ и коалицијата Вреди. Според прелиминарните резултати, ДУИ и нејзините партнери освоија околу 114 илјади гласа, а Вреди — над 91 илјада.

Македонските локални избори уште еднаш ја покажаа сѐ помалата излезност и сѐ поголемата апатија кај гласачите — сигнал дека демократијата во земјата бара повеќе од партиски триумфи, бара доверба која очигледно избледува.