Војната во Украина се подготвува да добие нова, опасна адреса – Белорусија. Според украински извори, претседателот Володимир Зеленски дал зелено светло за планирање удари по белоруските рафинерии за нафта, чекор што би ја вовлекол земјата на Лукашенко директно во конфликтот.

Целите што се споменуваат се конкретни: рафинеријата Мозир во Гомелската област и постројката Навтан во Витебската област. Логиката зад потегот е студена и пресметана – белоруските рафинерии служат како резерва што брзо може да го замени руското гориво кога руските рафинерии ќе бидат привремено исфрлени од строј од украинските дронови. Удри ја резервата, и немаш само еден, туку два празни резервоари.

Потегот доаѓа по ултиматумот на Зеленски Белорусија во рок од една недела да ги отстрани наводните уреди за прецизно навигирање на руските крстаречки ракети. „Ако не го сторат тоа, ние ќе го сториме”, порача тој – реченица што звучи кратко, но носи тежина на објава на нов фронт. Обвинувањето е јасно: Минск веќе му дава воена и логистичка поддршка на Москва.

Прашањето што виси е едноставно и страшно: каде застанува ова? Секое проширување на војната кон нова земја значи нов круг бегалци, нови сметки за гориво и нов слој несигурност што се протега и до Балканот. Лукашенко долго играше на тенка линија меѓу неутралноста и сојузништвото со Москва. Сега изгледа дека таа линија може да се претвори во фронт – а кога ќе се отвори нов фронт, ретко се затвора лесно.