Островот со форма на солза во Индискиот Океан – Шри Ланка – е едно од оние места каде во еден ист град можеш за неколку минути да поминеш покрај будистички храм, хиндуистички храм, џамија и црква. Таа религиозна разноликост, без тензија и без ѕидови меѓу луѓето, е првото нешто што изненадува секого што доаѓа со очекување за „егзотика”.

Влезот е преку Коломбо, главниот град, каде колонијалната архитектура се меша со модерни градби како кулата Лотус, највисоката кула во Јужна Азија. Оттаму патот води до Канди, духовната престолнина, каде храмот Шри Далада Малигава го чува светото реликвиа – заб на Буда, толку важен низ историјата што неговиот чувар бил признаван за легитимен владетел на островот.

Срцето на патувањето е таканаречениот Културен Триаголник, со пет од осумте локалитети на УНЕСКО. Тука е Сигирија, Лавовата Карпа – 1.231 скалило што се качуваат по гранитна стена каде принцот Касапа изградил недостапна палата откако го убил татко си. Археолошките градови Анурадхапура и Полонарува чуваат храмови стари со милениуми и џиновски статуи на Буда.

А можеби најубавиот дел не е ниту еден поединечен споменик, туку патот меѓу нив. Возот од Канди до Ела се провлекува низ пејзажи од деветнаесеттиот век, каде Тамилки во шарени сарии рачно го берат чајот на плантажите од Цејлон. Мостот со деветте лаци, стар над сто години, граден само од камен и тула, локалните го викаат „Мостот во небото”. Има места што се гледаат, а има и места што се чувствуваат – Шри Ланка е од вторите.