Таормина е она ретко место каде природата и раскошот се натпреваруваат кое ќе остане подолго во сеќавањето. Сицилијанскиот градец, закачен на карпа над Јонското Море, со поглед кон вулканот Етна, со векови привлекува уметници, патници и – во последно време – познати лица што бараат каде да се сокријат на елегантно место.

Срцето на градот е Античкиот театар, грчко-римски амфитеатар со акустика што и денес собира концерти, а од неговите трибини погледот паѓа истовремено на морето и на вулканот. Веднаш под градот е Изола Бела, мало заштитено островче поврзано со копното преку тесен појас песок кога морето е ниско – тиркизна вода и плажи со ситни камчиња. За оние што сакаат адреналин, до вулканските зони на Етна се стигнува со жичница до 2.500 метри, а водените тури одат и повисоко.

Се стигнува со директни летови до аеродромот Катанија, оддалечен околу 65 километри, па натаму со автобус или изнајмен автомобил. Историското јадро е затворено за возила – се оди пеш, што и не е казна кога секоја улица води до уште една глетка. За престој се препорачуваат два до три дена.

Кујната е посебна приказна: канолите полнети со рикота, пастата „ала Норма” со модар патлиџан, белото вино „Грило” со морски плодови. Хотелите се од оние што завршуваат на разгледници – „Белмонд Гранд Хотел Тимео” каде неодамна одседна Тамара Фалко, или „Фор Сизонс Сан Доменико Палас”. Таормина не е евтина дестинација, но е од оние што те уверуваат дека некои места едноставно вредат колку што бараат.