Одделот за сузбивање организиран и сериозен криминал при МВР, во координација со Обвинителството за гонење организиран криминал и корупција (ОЈО ГОКК), спроведе акција во која беа уапсени 11 лица, осомничени за лихварство и перење пари. Уште едно лице, 35-годишниот Б.К., е во бегство и недостапен за органите на прогонот.

Според МВР, деветмина од уапсените уште од почетокот на 2022 година се организирале во криминална група која позајмувала пари на лица во финансиски тешкотии, барајќи месечни камати од 5 до 15 проценти, со дополнително зголемување за секое задоцнување.

Кога оштетените не можеле да ги вратат парите, осомничените барале да им се предаде или заложи имотот, кој потоа го пренесувале на свое име. Наплатата се вршела во готово или преку трансакциски сметки, а според истрагата, групата прибавила незаконска добивка од над 125 милиони денари.

Парите биле потоа внесувани на банкарски сметки и во сефови, а за да се сокрие потеклото, биле користени за купување недвижности, возила и финансирање на луксузен живот. Дел од средствата биле повлекувани во готовина.

Меѓу уапсените се: Љ. Љ. (29), Д. В. (29), А. Т. (29), Д. Љ. (32), М. В. (25), М. Н. (36), А. Т. (32) и З. А. (42), кои се сомничат како соизвршители или помагачи во двете кривични дела, додека М. К. (73), П. К. (41) и Г. С. (46) се осомничени исклучиво за перење пари.

Од ОЈО ГОКК потврдија дека е отворена истрага против 12 лица, а претреси биле извршени на повеќе локации низ Скопје.