Во Лондон денеска беше потпишан Договорот за редовен воздушен сообраќај меѓу Македонија и Велика Британија, со кој се создаваат услови за отворање нови директни авиолинии и унапредување на воздушниот транспорт меѓу двете земји.

Договорот го потпишаа вицепремиерот и министер за транспорт Александар Николоски и британскиот министер за воздухопловство, поморство и декарбонизација Киер Метер, а документот претставува нова правна рамка за уредување на билатералните односи во областа на редовниот авионски сообраќај.

Според Министерството за транспорт, новиот договор ќе овозможи поголема слобода и флексибилност за авиокомпаниите, поефикасно работење, како и повеќе услуги, подобри конекции и нови дестинации со поконкурентни цени за патниците.

Николоски изјави дека Македонија во последната година бележи огромен раст во авиосообраќајот, што ја позиционира како сериозна конкурентна земја во регионот. Според него, ваквиот развој е резултат на владините политики за поддршка на цивилниот воздушен сообраќај, а домашните аеродроми имаат потенцијал да примат нови авиокомпании и зголемен број патници.

Од Министерството дополнително информираат дека договорот ги регулира и условите за интермодален превоз, важен за карго-транспортот, како и дека воспоставува високи стандарди за безбедност и заштита на патниците и авиокомпаниите, целосно усогласени со стандартите на ИКАО.