Поради одрон на левата коловозна лента кај Башино Село, сообраќајот на автопатот Скопје – Велес моментално се одвива само по една лента, информира Автомотосојузот на Македонија (АМСМ).

Инцидентот е забележан по патарината Сопот и пред тунелите кај Башино Село, а на терен се испратени екипи од Полициската станица за безбедност во патниот сообраќај Велес. Вчера на истото место биле регистрирани две сообраќајни незгоди со материјална штета, но без повредени лица.

АМСМ предупредува возачите на влажни коловози низ целата земја и апелира за внимателно возење и почитување на сигнализацијата, особено на патиштата низ котлини, речни долини и клисури, каде постои ризик од одрони — Катланово–Велес, Маврово–Дебар–Струга, Виница–Берово и Кочани–Делчево.

Интензитетот на сообраќајот на патните правци надвор од градските средини е умерен, а на граничните премини нема подолги задржувања.

Од АМСМ потсетуваат дека патниот правец Охрид–Ресен преку Националниот парк Галичица останува отворен за возила до 3,5 тони, а во тек се градежни работи на повеќе делници, меѓу кои и санација на потпорни ѕидови на обиколницата кај Скопје (пат А2), каде што сообраќајот е пренасочен.

Исто така, на патниот правец Велес–Тетово, меѓу клучките Волково и Кондово, сообраќајот е целосно затворен поради градежни зафати и се одвива двонасочно во должина од околу 300 метри во насока Тетово–Велес.