Рускиот енергетски гигант „Лукоил“ официјално објави дека ги става на продажба сите свои странски средства, откако минатата недела беше погоден од нови санкции од САД.

Во соопштението на компанијата се наведува дека, поради воведените рестриктивни мерки, „Лукоил“ веќе започнал да прима понуди од потенцијални купувачи.

Овој потег ќе има директно влијание врз сопственичката структура на бензинските пумпи на „Лукоил“ во Македонија, но и во целиот регион.

Паралелно со санкциите, Министерството за финансии на САД издаде општа лиценца со која се дозволуваат трансакции потребни за прекин на работењето со компанијата, со рок до 21 ноември.

Од „Лукоил“ појаснуваат дека продажбата ќе се одвива токму според оваа лиценца, со можност таа да се продолжи доколку биде потребно, со цел да се овозможи континуирано функционирање на странските филијали додека трае процесот на продажба.

Компанијата моментално има производствени проекти во 12 земји и останува значаен играч на европскиот енергетски пазар. Меѓу нејзините средства се и клучни рафинерии во Европа, вклучувајќи ја единствената рафинерија во Бугарија, како и мрежи на бензински пумпи во Романија, Бугарија, Хрватска, Србија, Црна Гора и Македонија.

Во Македонија, „Лукоил“ располага со околу 40 бензински пумпи и неколку стотици вработени, чии позиции би можеле да бидат загрозени во зависност од исходот на продажбата.

Прашањето што сега се поставува е: кој ќе ја преземе енергетската мрежа на „Лукоил“ во Македонија и регионот – и дали тоа ќе значи нова енергетска прераспределба на Балканот?