Meta во вторникот го претстави Muse Image, нов генератор на слики со вештачка интелигенција изработен во нејзиното одделение Superintelligence Labs. Алатката, интерно позната под кодното име Mango, е бесплатна и веднаш достапна преку апликацијата Meta AI, во приказните на Instagram и во WhatsApp. Дотука – уште еден генератор во морето генератори. Но еден детал ја издвојува приказната.

Muse дозволува да означите кој било корисник со јавен профил на Instagram и неговите фотографии да ги искористите како суровина за ваши ВИ-креации. Без прашање, без известување. Политиката на Meta го кажува тоа црно на бело: други луѓе „може да создаваат содржина со вашата содржина од Instagram”, а вие „нема да бидете известени за содржината создадена со ВИ-алатките”. Еден корисник на X го нарече ова „приватносна мина што чека да експлодира” – и тешко е да се најде попрецизен опис.

Meta, се разбира, тврди дека корисниците „имаат контрола” – постои поставка со која може да го исклучите користењето на вашите фотографии. Преведено од корпоративен јазик: сè е дозволено додека самите не откриете каде се крие копчето за забрана. Стар трик на индустријата – согласноста е автоматска, а одбивањето бара труд.

Остатокот од пакетот е предвидлив: готови шаблони за „инспирација”, уредување слики со текстуални команди, бришење непожелни минувачи од фотографии, генерирање QR-кодови, па дури и проба како половен кауч од Facebook Marketplace би изгледал во вашата гаража. Бесплатно за секојдневно создавање, а над одредена граница – претплата. Формулата е позната: прво навикнување, па наплата. А прашањето што виси е поедноставно – кој на Балканот, каде јавен профил имаат речиси сите, воопшто ќе ја најде таа поставка пред некој да го „вгради” во туѓа објава?