Куклица заложник на една жена: наплаќа влез на своја рака и фрла камења на туристите, градоначалникот вети крај

Едно од најнеобичните природни чуда во Македонија – Куклица, каменените кукли кај Кратово – е заложник на една жена што со години не ги пушта туристите, наплаќа влез на своја рака, а на посетителите, како што се пренесува, им се заканува и фрла камења.

Локалитетот со зачудувачки камени столбови, стари милиони години, отсекогаш бил бесплатна атракција што секој можел да ја посети. Но денес пристапот е узурпиран – жената и нејзините блиски наплаќаат влез со сила, а една девојка од Куманово јавно побара помош на социјалните мрежи откако наишла на ваков пречек.

Градоначалникот на Кратово беше јасен: „Доброволно или на сила, узурпаторите ќе ја напуштат Куклица.” Звучи одлучно, но прашањето е зошто воопшто се стигнало дотука. Како едно природно наследство под заштита завршило како приватна наплатна рампа на некој што нема никакво право над него?

Ова е приказна што ја знаеме предобро на Балканот – државно или заедничко добро тивко се приграбува, додека институциите гледаат на страна додека проблемот не стане толку голем што ќе се појави на социјалните мрежи. Куклица не е ничија лична сопственост. Таа е на сите нас, и токму затоа никој нема право да наплаќа влез на неа, а уште помалку да фрла камења на туристите што дошле да ја видат.

Прашањето сега е дали зборовите на градоначалникот ќе се претворат во дело, или ќе останат уште едно ветување што избледува штом камерите ќе се свртат на друга страна. Куклица чекала милиони години за да ја видиме. Не заслужува да биде заложник на нечиј инает.