На 22 август 2026 година, клубот Ребел во Охрид ја донесува британската диџејка и продуцентка Adrianna – едно од имињата во подем на европската техно сцена, што ова лето се приклучува на низата меѓународни настапи на езерскиот брег.

Adrianna има база во Велика Британија и репутација на прецизни, моќни продукции и сетови што сè повеќе се вртат низ клубовите и фестивалите ширум Европа. Својот звук го опишува како електронски тех-хаус споен со вокали што создава голем, полн клубски feeling. Покрај кариерата зад пултот, таа е основачка на TMPL Music – платформа преку која курира техно изданија и настани на клубски и фестивалски сцени во Британија и Европа.

Ребел ова лето се етаблираше како една од главните дестинации за електронска музика во Македонија, со состав што ги спои светски познати диџеи и амбиент директно на брегот на Охридското Езеро. Сетот на Adrianna е дел од таа програма – уште една ноќ во која езерото добива саундтрак каков што порано мораше да се бара во метрополите.

Влезницата чини 500 денари преку karti.com.mk, а забавата почнува во доцните вечерни часови. За љубителите на техно што сакаат летен клубски настан на вода, ова е една од последните вакви ноќи оваа сезона во Охрид.