По повеќе од една деценија тишина, легендите на македонскиот рок се враќаат на голема сцена. Меморија најавува спектакл во Спортскиот центар „Јане Сандански” во Скопје на 23 октомври 2026 година – првиот заеднички настап на бендот по 2016 година.

Меморија е група со длабоки корени. Основана е во 1984 година, а низ речиси четири децении низ нејзините редови поминаа многу музичари, но константата остана Петар Георгиевски – Перо Камиказа, лидер и единствен постојан член. Со дебитантскиот албум „Оган под ѕвездите” и хитови што станаа дел од македонскиот рок канон, бендот се етаблира како можеби најнационалната рокенрол група кај нас – група низ чии песни тече љубов и почит кон сопствените вредности, кон луѓето и кон земјата.

Концертот не е само настап, туку дел од поширок проект. Заедно со шоуто, во продукција на KLS и МРТ се подготвува документарна серија од 12 епизоди што ќе ја раскаже не само приказната на Меморија, туку и развојот на македонскиот рокенрол низ децениите. За генерациите што пораснаа на овие песни, тоа е повеќе од концерт – тоа е враќање на едно време.

Организаторите ветуваат врвна сценографија, гостински појавувања на познати имиња од македонската естрада и хитови што ги поврзуваат повеќе генерации. Билетите се движат од 600 до 1000 денари преку karti.com.mk, а концертот почнува во 20:00 часот.