Пред два месеци Арбен Фетаи поднесе оставка на функцијата вицепремиер, откако во јавноста се отворија прашања за неговите долги отсуства од работа. Вчера објави дека со одлука на Владата е именуван за специјален пратеник на Македонија за Европската Унија, со седиште во Брисел.

„Ново поглавје во служба на европската интеграција на земјата”, напиша тој. Чест, но и голема одговорност. Патот кон Брисел продолжува, со решителност и партнерство.

Прашањето што Османи го постави наглас

Потпретседателот на ДУИ и поранешен министер за надворешни работи Бујар Османи не тргна по личноста, туку по функцијата. Македонија веќе има Постојана мисија во Брисел – со амбасадор и со десетици дипломати.

Прашањето му е директно: каков е мандатот на овој нов претставник, каква задача ќе извршува што не може да ја заврши амбасадорот, Мисијата, Министерството за надворешни работи и Министерството за европски прашања? Според него, создавањето паралелен канал ја ослабува државната дипломатија и создава нејаснотии околу тоа кој ја претставува земјата пред институциите на ЕУ.

Тоа е прашање на кое до сега нема одговор во ниту едно соопштение. А одговорот е важен – не поради Фетаи, туку поради тоа што дипломатијата функционира со еден глас или не функционира.

Реакциите на опозицијата

ЛДП го нарече именувањето срамно и скандалозно и го опиша како „награда за неодговорност”. Левица тврди дека во земја каде граѓаните се борат за минимална плата, Владата создава политичка каста на привилегирани лица, и потсети дека Фетаи, додека бил вицепремиер, со месеци не одел на работа, а продолжувал да зема плата.

Од Владата велат дека именувањето е спроведено по законска процедура и дека целта е забрзување на европската интеграција.

Сигналот кон Брисел

Легалноста на потегот не е спорна – Владата има право да именува специјални пратеници. Спорно е нешто друго, а тоа е порака.

Кога човек кој заминал од извршна функција поради отсуство од работа се враќа со дипломатска функција во Брисел, тоа е порака и кон домашната јавност и кон институциите пред кои Македонија бара членство. Институции кои во своите извештаи редовно го користат зборот „заслуги” кога зборуваат за јавната администрација.

Ако мандатот на новиот пратеник е навистина различен од оној на Постојаната мисија, Владата има едноставна работа пред себе: да го објасни. Со документ, не со соопштение.