Брвеница ќе избира градоначалник на 18 октомври, по смртта на досегашниот градоначалник Јовица Илиевски. И веќе пред почетокот на кампањата, изборната трка го покажа она што секој локален избор во Полог го покажува – партнерите во власта на терен не одат заедно.

Тројца кандидати, две коалиции во иста влада

ВМРО-ДПМНЕ на седница на Извршниот комитет едногласно го избра Стојанчо Радичевски, актуелен претседател на нивниот Општински комитет во Брвеница, дипломиран правник со магистратура по граѓанско право. Од партијата очекуваат, како што соопштија, „обединување на сите прогресивни сили“ и поддршка за решение што според нив значи напредок за општината.

Коалицијата ВЛЕН прва излезе со свој кандидат – Јакуп Хусеини, магистер по правни науки кој моментално работи како државен службеник во самата Општина Брвеница. Предноста што ја истакнуваат е дека ја познава општинската администрација, процедурите и секојдневните потреби на жителите, па би можел веднаш да почне со работа. Кандидатурата се промовира под слоганот „Од првиот ден, во служба на жителите на Брвеница“.

Демократската унија за интеграција го предложи Аркин Јахији.

Што кажува ова

ВМРО-ДПМНЕ и ВЛЕН седат во иста влада. Во Брвеница трчаат едни против други. Тоа не е скандал – тоа е нормалниот механизам на македонската политика, во кој коалицијата важи во Собранието, а на терен секој брани свој простор. Но реченицата за „обединување на сите прогресивни сили“ добива поинаква тежина кога партнерот веќе излегол со свој човек.

Интересно е и тоа што двајца од тројцата кандидати се правници, а еден од нив е вработен во општината за која се кандидира. Тоа значи дека познава сè – и буџетот, и процедурите, и досиејата. Дали тоа е предност или конфликт, гласачите ќе одлучат.

Од кампањата очекувајте да се зборува за локална инфраструктура, комунални услуги и работата на администрацијата. Од искуство, најмногу ќе се зборува за тоа кој со кого е.