Ел Нињо, еден од најсилните климатски феномени на планетата, забрзано јакне. Најновите мерења и климатските модели покажуваат дека до крајот на есента и почетокот на зимата би можел да достигне интензитет што се бележи многу ретко – меѓу најсилните од почетокот на инструменталните мерења.

Феноменот настанува кога температурата на морската површина во централниот и источниот дел на тропскиот Пацифик стане значително повисока од просекот. Тоа ги менува обрасците на атмосферската циркулација, влијае врз движењето на млазните струи и предизвикува промени на времето низ целиот свет – температури, врнежи, суши, поплави, бури.

Сегашните мерења се тие што ги вознемируваат метеоролозите. Во делови од централниот Пацифик температурата на површината е повеќе од пет степени над просекот. Според американскиот климатски модел NCEP CFSv2, аномалијата би можела да надмине три степени Целзиусови. Сè над два степени влегува во категоријата „супер Ел Нињо” – редок и силен настан. Причината за брзото јакнење е моќен подводен топол бран, познат како Келвинов бран, кој ја крева огромната маса топла вода кон површината.

Првите последици веќе се видливи. Во јули во САД и Канада се регистрирани обрасци карактеристични за силен Ел Нињо, а во август се очекува потопол западно-централен дел на САД, пониски температури на исток и помалку дожд во јужните делови.

Европа, за разлика од Северна Америка, реагира со задоцнување. Во првата половина на август се очекува доминација на висок воздушен притисок над централниот, јужниот и југоисточниот дел на континентот – значи и над нас. Најизразеното влијание врз европското време, велат метеоролозите, ќе се почувствува дури во текот на есента и зимата.

Тоа е делот што вреди да се запамети сега, а не во ноември. Ако прогнозите се остварат, зголемена е веројатноста за подолготрајни топлотни бранови, обилни врнежи, поплави и суши. Тоа не е предвидување за конкретен ден – никој не може да каже што ќе биде на 3 декември. Тоа е предвидување за тоа колку често екстремот ќе престане да биде исклучок.

Прашањето, значи, не е дали ќе стигне. Прашањето е кој кај нас ја чита оваа прогноза во август – или ќе почекаме реката повторно да ни го покаже одговорот?