Во една од најважните индустриски гранки во земјата – тешката индустрија – веќе неколку недели се случуваат сериозни потреси. Повеќе фабрики, рудници и индустриски капацитети се соочуваат со намалена продукција, големи загуби и неможност да ги покријат зголемените трошоци. Како резултат на тоа, започнати се процеси за масовно намалување на бројот на вработени.

Најкритична е состојбата во рудникот „САСА“, каде според добро упатени извори само вчера биле понудени 33 спогодбени пакети за заминување од компанијата. Планирано е бројот на вработени да се намали за најмалку 100 лица до крајот на месецот, а неофицијално се говори дека бројката може да се дуплира.

Синдикатот СИЕР веќе е информиран за првите спогодби, а претседателот на Синдикатот за индустрија, енергетика и рударство, Игор Ѓерасов, предупредува дека доколку започне масовно отпуштање, ќе следи остар одговор. Според него, најзасегнати ќе бидат административните и техничките служби, додека јамските работници засега не се цел на отпуштања.

Од рудникот најавуваат официјален став во текот на утрешниот ден. Истовремено, неофицијални информации упатуваат дека намалувањето на бројот на вработени е дел од подготовките за продажба на рудникот.

Во позадина на овие случувања, само пред неколку недели рудникот доби нов директор – Џејми Караматиќ, додека компанијата „Централ Азија Металс“ (CAML) уверува дека останува посветена на инвестициите и одржливиот развој. На средба со министерката Сања Божиновска, компанијата изразила подготвеност за усогласување со построгите еколошки и безбедносни стандарди предвидени со новиот Закон за рударство.

Сепак, економските предизвици се значително подлабоки. Професорот Дејан Трајковски објаснува дека падот на светските цени на металите, намалената побарувачка во германската автомобилска индустрија, високите енергетски трошоци, политичката нестабилност, но и строгите еколошки барања се главните причини за кризата.

Дополнително, веќе има најави за отпуштања од 30 до 40 лица и во други индустриски капацитети низ државата. Ситуацијата дополнително се усложнува со заминувањето на странските инвеститори во автомобилската индустрија, како „Аптив“ и „Дура“, каде работат над 1.000 луѓе.

Иако премиерот Христијан Мицкоски изјави дека „не е крај на светот“ што дел од инвеститорите ја напуштаат државата, трендовите во индустријата покажуваат сериозна загриженост. Доколку масовните отпуштања продолжат, Македонија би можела да се соочи со уште поголеми економски последици во наредните месеци.