Договорот важел четири дена. Толку. Потоа откупната цена на пиперката „ајварка“ во Струмичко повторно падна на 25 денари за килограм, иако по претходните протести со посредство на министерот за земјоделство беше договорено да изнесува 30.

Земјоделците не се лутат само на цената. Лутат се затоа што со посредство на државата постигнале договор што во пракса се распаднал за помалку од недела дена.

„Само четири дена важеше договорот за пиперката, а еве веќе наредните пет дена пиперот во Струмичко се откупува по 25 денари килограм, за ‘честитка’ од фабриките имаме веќе најавено и нови пониски цени за од понеделник“, пишуваат од Месното здружение „Млади Муртино“, организатори на протестите. И прашуваат директно: „Каде е министерот кој што е одговорен медијатор да го спроведе и исконтролира овој ‘договор’ до крај?“

Аритметиката на загубата

Земјоделците ја имаат пресметано производната цена: еден килограм куртовска капија од пластеник ги чини 29,22 денари. Откупната цена е 25.

„Математиката е проста. Секој килограм пиперка што се продава денес е 10 денари загуба“, наведуваат од здружението. Тоа значи дека колку повеќе произведеш, толку повеќе губиш – економска логика во која секој нормален бизнис би престанал да работи.

Договорот што беше постигнат предвидуваше 40 денари за прва класа, 30 за втора и индустриска, и 15 денари за шкартот. Од тоа не остана ништо.

Ветувањето и она што дојде по него

На состанокот со откупувачите земјоделците барале писмени гаранции дека договорените цени и класи ќе се почитуваат. Не ги добиле. Тие го прашале министерот Борче Серафимовски како ќе гарантира дека фабриките ќе го почитуваат усниот договор. Одговорот, како што го пренесуваат, бил самоуверен: по состанокот ќе се одржи прес-конференција на која јавно ќе бидат соопштени договорените цени, ќе мора да се почитуваат, а во спротивно тоа ќе значи чекор на фабрикантите против државата и проблемот ќе биде решен.

„Еве го чекорот, министере, дојде за неполни четири дена од вашата прес-конференција. Сега на вас е редот“, порачуваат сега земјоделците.

По претходниот договор Државниот инспекторат за земјоделство најави засилени контроли на откупните пунктови во струмичкиот регион. Ако тие контроли се спроведувале, резултатот од нив не се гледа во цената на пунктот.

Протестот

Новиот протест е закажан во 11 часот пред подрачната единица на Министерството за земјоделство во Струмица, со тргнување во 10:15. Земјоделците повикуваат да се дојде и со земјоделска механизација, и нагласуваат дека протестот ќе биде мирен и без партиска заднина. Мицкоски е повикан на „екскурзија до Струмица“ за лично да ги види проблемите.

Освен цената, земјоделците реагираат и поради тоа што, како што тврдат, не им се исплатени субвенциите.

Она што ја прави оваа приказна поголема од една култура и еден регион е прашањето што стои под неа. Ако државата посредува во договор и тој договор не важи ни една недела, што точно значи посредството на државата? Земјоделците велат дека се чувствуваат изманипулирани и потценети, и дека главната цел на медијацијата била да се стиши гласот, а не да се реши проблемот. Тешко е тој заклучок да им се оспори со факти.