Агенцијата за храна и ветеринарство (АХВ) во последните десеттина дена спроведе 445 засилени инспекциски контроли, со фокус на објектите што се наоѓаат во непосредна близина на основни и средни училишта — места од кои децата најчесто купуваат храна. Резултатите се загрижувачки: изречени се 15 забрани за вршење дејност, а уништени се 696 килограми небезбедна храна и производи од непознати добавувачи.

Контролите покажале сериозни пропусти во голем број објекти. Кај 19 оператори е утврдено пуштање во промет на небезбедна храна, а кај уште 30 се констатирани незадоволителни хигиенски услови. Дури 26 објекти работеле нерегистрирани, без основна правна рамка за продажба на храна.

АХВ открила и дека 16 оператори воопшто не имплементирале процедури за Добра хигиенска и Добра производствена пракса, а кај 32 не бил спроведен ниту задолжителниот здравствено-санитарен преглед на вработените. Во три објекти не била направена задолжителната дезинфекција, дезинсекција и дератизација, а седум не ги исполнувале техничките услови за работа. Несоодветно означена храна била најдена во седум други објекти.

Освен затворањата, Агенцијата изрече и парични казни за 77 оператори, во вкупна вредност од 36.470 евра. Издадени се 103 решенија со наредби за отстранување на утврдените неправилности, како и 23 опомени.

Од АХВ порачуваат дека контролите околу училиштата ќе продолжат со засилен интензитет, со цел децата да имаат пристап до безбедна храна.