Обвинителниот акт за трагедијата во кочанскиот „Клуб Пулс“ открива драматични детали: инженеркатa Милка Едровска и нејзината фирма „Венци Проект“ со години обезбедувале лажна и непотполна документација за објектот, кој работел без клучните безбедносни проекти. Наместо законски пропишаните елаборати и инженерска документација, Едровска наводно изготвила „Основен проект“ што не содржел ниту статика, ниту електрика, ниту ВК-инсталации — а најкритично, немал ни елаборат за противпожарна заштита.

Проектот, направен во 2012 година по барање на сопственикот Дејан Јованов, според обвинителството бил суштински некомплетен и спротивен на Законот за градење. Дополнително, Едровска знаела дека објектот не смеел да врши угостителска дејност, бидејќи ДУП-от на локацијата предвидувал „лесна индустрија“.

Скандалот станува уште поголем во 2023 година. Кога Јованов ја префрлил дејноста во новата фирма „ММММ Кафе“ ДООЕЛ Кочани, повторно побарал документација од истата инженерка. Наместо нов проект и увид на терен, обвинението тврди дека Едровска го земала стариот фалсификуван документ, ја сменила само првата страница — името на инвеститорот, датумот (15.02.2023) и печатот — и го предала како нов проект.

Овој лажен документ му овозможил на сопственикот да продолжи да работи нелегално, да добива дозволи и да оперира со објект кој воопшто не ги исполнувал минималните стандарди за безбедност — што на крајот довело до трагедија во која загинаа 63 лица.

Милка Едровска и „Венци Проект“ се товарат за кривично дело „Тешки дела против општата сигурност“ како дел од поширокиот синџир пропусти што го овозможиле функционирањето на небезбедниот клуб „Пулс“.